حوسێنی مەسعوودی خانگاە
چه‌ند به‌ڵگه‌یه‌کی گرینگ
چالاکیی کۆمار گه‌یشتووه‌ته کرماشانیش
حه‌سه‌نی قازی
هه‌تا ئێستا له‌و نووسین و شیکردنه‌وانه‌ی وا سه‌باره‌ت به کۆمار بڵاو بوونه‌ته‌وه،زۆر که‌م باسی کار و تێکۆشانی حیزب دێمۆکڕاتی کوردستان له ده‌ره‌وه‌ی مه‌ڵبه‌ندی موکریان به‌تایبه‌تی له ناوچه باشوورییه‌کانی ڕۆژهه‌ڵاتی کوردستان کراوه.
له ساڵی 2008 به‌ڕێز بابه‌شێخ ناسری چه‌ند به‌ڵگه‌یه‌کی بڵاو کردووه‌ته‌وه که بوونی چالاکی حیزب له کرماشان ده‌سه‌لمێنێ. به‌ڕێزیان سه‌رچاوه‌ی ئه‌و به‌ڵگانه ئاوا باس ده‌کا:
"مه‌رحومی ماموستا سه‌یدحوسێن مه‌سعودی پێشنوێژ و مفتی شافعی مه‌زهه‌به‌کانی کرماشان ، که‌رحمه‌تی ئه‌ندامی کۆمه‌له‌ی ژ.ک و پاشان شه‌ره‌فی ئه‌ندامه‌تی حیزبی دیموکراتی پێ درابوو، دیاره مرحوم مامۆستاسه‌یدحوسێن له دایک بووی خانه‌گای هه‌ورامان و بنار کێوی ئاتشگا و بۆخوێندن وله ڕێگای فه‌قیه‌تیه‌وه له ناوچه‌ی موکریان نیشته‌جێ ده‌بێت وهه‌رله وێش له گه‌ل خانمێ له سیدانی نۆباری بۆکان به ناوسه‌یدزاده ئامینه ازدواج ده‌کا، له‌گه‌ڵ مه‌رحوم ماموستاحه‌قیقی هاوفه‌قێ وپیکه‌ویش ده‌بنه ئه‌ندامی کومه‌ڵه‌ی ژ.ک. وبناغه دانه‌ری حیزبایه‌تی وکۆمیته‌ی کرماشان له ڕاستی دا ئه‌و بووگه، یه‌کتر له‌وان مه‌رحوم سه‌یدمحه‌ممه‌د مه‌سعودی برای ماموستا سه‌یدحوسێن که له‌لایه‌ن کۆمیته‌ی کرماشانه‌وه وه‌ک ڕابتی کومیته کرماشان هه‌روه‌ک له وڵامی نامه‌که‌ی کومیته‌ی کرماشان له لایه‌ن کومیته ناوه‌ندی وه ئاماژه‌ی پێ کراوه دیاری کراوه و وه‌رگیراوه به ناوی نه‌هێنی( فه‌قێ ) وله ڕاستی دا ئه‌و به‌ڵگانه له لای ناوبراو را گه‌یشته ده‌ستی من، دیاره کۆمه‌ڵێ به‌لگه‌ونوسراوه هی ئه‌و سه‌رده‌مه وتا کودتای سی ودو له جیگایه‌ک له کرماشان شاردرانه‌ته‌وه که هیوا دارم ده‌رفه‌ت بێت وده‌ستمان پی بگات ،که گه‌نجینه‌یه‌کی به نرخه له چالاکی ئه‌ندامانی حیزب له‌و سه‌رده‌مه‌دا ، که‌سانی ترکه شه‌ره‌فی ئه‌ندامه‌تی حیزبیان له کۆنه‌وه له شاری کرماشان هه‌بوو ، ئاغای محه‌ممه‌د سه‌عید حافدی قزلجی خه‌لکی بۆکان ودانیشتوی کرماشان ومیرزا عه‌بدولکه‌ریم رۆسته‌می به‌زاز خه‌ڵکی جوانرۆ و دانیشتوی کرماشان ،وه‌ستا عه‌بدالخالق ساڵحزاده خه‌ڵکی باینگان ودانیشتوی کرماشان ."
به‌ڵگه‌کان:
به‌ڵگه‌ی یه‌که‌م له به‌رواری 9/8/1325 دا نووسراوه به ئیمزای فهرماندهی هێزی سه‌رده‌شت و ئه‌گه‌رچی ناوی فه‌رمانده‌که به ئیمزاکه‌یه‌وه ده‌رناکه‌وێ، به‌ڵام له به‌ر ئه‌وه‌ی پله‌ی ئه‌فسه‌رییه‌که‌ی نووسراوه (پۆدپۆلکۆڤنیک / سه‌رپۆلی 2 ) ده‌رده‌که‌وێ که ئه‌و فه‌رمانده‌یه به‌کر حه‌وزی بووه، به‌ڵگه‌که باسی چوونی پێشمه‌رگه‌یه‌که بۆ سابڵاغ و ناساندنی.
ئارم و نیشانی کۆماری کوردستان
وه‌زاره‌تی هێزی جمهوورییه‌تی کوردستان
هێزی ناوه‌ندی
ژماره
به‌رواری
بۆ پۆستی دێمۆکڕات
سه‌ید محه‌مه‌د سه‌عید عه‌بدولڕه‌حمان له لای ئێمه مره‌خه‌س کراوه به ئیشی دێمۆکڕات ده‌چێته مهاباد. هیچ که‌سێک موزاحیمی نه‌بێ و ئه‌گه‌ر له ڕێگاته‌سادوفی به هه‌ر ماشێنێک بێ هه‌ڵی بگرێ بۆ مهاباد
ئیمزا
پۆدپۆڵکۆڤنیک [ به‌کر حه‌وێزی]
فهرماندهی مه‌نته‌قه‌ی سه‌رده‌شتێ
9/8/ 1325
به‌ڵگه‌یه دووه‌م که له به‌رواری 10/8/1325 دا نووسراوه و فه‌رمانی یه‌ک له هه‌ڵسووڕاوانی پایه به‌رزی کۆمار و حیزبی دێمۆکڕاتی کوردستان،یه‌کێک له معاوینه‌کانی سه‌رۆکی حیزب مه‌نافی که‌ریمی یه و ده‌یسه‌لمێنی حیزب تێکۆشاوه بۆ به‌رفراونکردنی جه‌غزی جوگرافیایی چالاکییه‌کانی و له کرماشان کۆمیته‌ی محه‌لی هه‌بووه. زۆر وێده‌چێ ئه‌و چالاکیانه درێژه‌ی ئه‌و تێکۆشانانه بووبێ که له سه‌ر وبه‌ندی کۆمه‌ڵه‌ی ژ.ک. دا به‌ڕێوه‌چوون.
ژماره: 8583
به‌روار: 10/8/ 25 [13]
په‌یوه‌ند
نیشانی کۆماری کوردستان
حیزبی ذێمۆکڕاتی کوردستان
مهاباد
کۆمیته‌ی مه‌رکه‌زی
ئاغای فقیه
بینا به ته‌سویبی جه‌له‌سه‌ی ئینتیخاباتی یه‌کی ڕه‌زبه‌ری کرماشان که به هۆی نامه‌ی ژماره 11-
8/7/ 1325 کۆمیته‌ی کرماشان هاتبوو به هۆی ئه‌و نامه‌یه پێت ڕاده‌گه‌یندرێ که له سه‌ر قه‌راری کۆمیته‌ی
مه‌رکه‌زی حیزبی دێمۆکڕاتی کوردستان جه‌نابت به --- ڕابیتی کۆمیته‌ی محه‌لی کرماشان داندرای. لازمه زۆر به جیدییه‌ت مه‌شغووڵی ئه‌نجامی وه‌زایفی پێ ئه‌سپێردراوی خۆت بی.
معاوینی کۆمیته‌ی مه‌رکه‌زی حیزبی دێمۆکڕاتی کوردستان [ مه‌نافی] که‌ریمی
مۆری کۆمیته‌ی مه‌رکه‌زی حیزبی دێمۆکڕاتی کوردستان
به‌ڵگه‌ی سێهه‌م :له به‌رواری 16/8/ 1325 دا نووسراوه و تێیدا هه‌ڵگری نامه وه‌ک ئه‌ندامێکی حیزب ناساێندراوه و له ڕاستی دا
وه‌ک پسوله‌یه‌کی هاتوچوو وایه، ئه‌و به‌ڵگه‌یه له لایه‌ن عه‌لی خوسره‌وییه‌وه ئێمزا کراوه.
ژماره
به‌روار 16/8/ 1325
په‌یوه‌ند
نیشانی کۆماری کوردستان
حیزبی دێمۆکڕاتی کوردستان
مهاباد
کۆمیته‌ی مه‌رکه‌زی
بۆ ته‌واوی پۆسته‌کان و کۆمیته‌کانی حیزبی دێمۆکڕاتی کوردستان
هه‌ڵگری ئه‌و نامه‌یه [له] ئه‌عزای حیزبی دێمۆکڕاتی کوردستانه. له سه‌رتانه هه‌موو جۆره کۆمه‌گێکی پێ بکه‌ن.-
له ته‌ره‌ف معاونی کۆمیته‌ی مه‌رکه‌زی حیزبی دێمۆکڕاتی کوردستان - [عه‌لی] خوسره‌وی
مۆری کۆمیته‌ی مه‌رکه‌زی حیزبی دێمۆکڕاتی کوردستانی ئێران
تێبینی: ئه‌من ئه‌و به‌ڵگانه‌م له تۆڕی کۆمه‌ڵایه‌تی فه‌یس بووک له دیواری ماڵی کاک قادری خه‌نده‌ره‌ش چاو پێکه‌وت و دوایه زانیم به‌ڕێزیشیان له نووسینێکی وه‌رگرتووه که له‌گه‌ڵ به‌ڵگه‌کان کاکه بابه‌شێخی ناسری له ساڵی 2008 له ماڵپه‌ڕی پێشمه‌رگه‌کان دا بڵاوی کردووه‌ته‌وه. ئه‌و کاره‌ی به‌ڕێز ناسری جێی پێزانییه.
له سه‌رده‌می کۆمار دا هێندێک له فۆرمی کاغه‌زی کۆمار و حیزب له سه‌ر کاغه‌زی ئێداراتی حکوومه‌تی مه‌رکه‌زی چاپ کراونه‌ته‌وه. دیاره ئه‌وه له به‌ر که‌م بوونی کاغه‌ز بووه، هه‌ر وه‌ک لێره له به‌ڵگه‌ی دووه‌م دا ده‌بینن که ووشه‌ی "وزارت دارائی" له پشته‌وه‌ی کاغه‌زه‌که به جوانی دیاره.
