ئه‌و یایه‌ی کچه‌کان به ڕێوه ده‌با ده‌کرێ یای ویڵمای سه‌ییادیان مودیری مه‌دره‌سه‌ی کچان بێ
ڕۆژنامه‌ی کوردستان، ژماره‌ی 27،دووشه‌مۆ 5-ی خاکه‌لێوه‌ی 1325/ 25- مارسی 1946
جێژنی سه‌ربه‌خۆیی و ناساندنی پێشه‌وای کوردستان له لایه‌ن ئامۆژگارانی مه‌دره‌سه‌ی کچان
به بۆنه‌ی پێک هاتنی ئاره‌زووی چه‌ندین ساڵه‌ی نه‌ته‌وه‌ی کورد و ناساندنی پێشه‌وا و سه‌ربه‌خۆیی کوردستان ڕۆژی چوارشه‌مۆ 10-12-1324 له لایه‌ن ئامۆژگارانی مه‌دره‌سه‌ی کچان ساتی 2-ی پاش نیوه‌ڕۆ له ساڵۆنی ئیداره‌ی فه‌رهه‌نگ جێژنێکی زۆر جوان ساز کرا. یای پێشه‌وای کوردستان و ژمارێکی زۆر له‌یایه‌کانی ئه‌ندامه‌کانی حیزبی دێمۆکڕاتی کوردستان وگشت ته‌به‌قاتی شاری مه‌هاباد له‌م جێژنه دا بوون.
خولاسه‌ی نوتقی یای ویڵمای سه‌ییادیان مودیری مه‌دره‌سه‌ی کچان
له‌و یایانه‌ی زه‌حمه‌تیان کێشاوه و له‌م شادیه دا ده‌گه‌ڵ ئێمه شه‌ریک بوون له لایه‌ن ئامۆژگاران و شاگردانی مه‌دره‌سه‌ی کچان سوپاس ده‌که‌م .ئه‌م موه‌فه‌قییه‌ته گه‌وره‌یه به خانمی موعه‌زه‌می پێشه‌وای کوردستان موباره‌کبادی عه‌رز ده‌که‌م و هه‌موو به ده‌نگی گه‌وره ده‌ڵێین: خودا پایه‌دار کا حه‌زره‌تی پێشه‌وای کوردستان. و پێویسته له‌و جێژنه مباره‌که دا هێندێک مه‌تڵه‌ب له بابه‌ت حاملاندن و منداڵ به‌خێو کردن عه‌رز بکه‌م و هومێدم هه‌یه چاک گوێتان لێ بێت:
یایانی خۆشه‌ویست بزانن: ئه‌و میله‌تانه‌ی که هه‌نگاویان له شه‌قامی زانست و پێشکه‌وتن ناوه ژن و پیاوی وان پێکه‌وه ده‌ستیان داوه‌ته ده‌ست یه‌کتر وه‌کوو خوشک و برا بۆ نه‌جاتی میله‌تی خۆیان هه‌وڵیان داوه له خۆ بوردنیان نواندووه و ته‌واوی کچانی خۆیان زۆر چاک په‌روه‌رش داوه و نه‌یان هێشتووه ساتێک له مه‌دره‌سه و خوێندنی خۆیان وه‌پاش که‌ون.له‌وه پێش که له چنگ دیکتاتۆراندا گرفتار بووین نه‌مان ده‌توانی به زمانی خۆمان بخوێنین. تا له‌م شه‌ڕه گه‌وره دا به ده‌ستی یه‌که پیاوی مه‌یدانی ئازادی مارشاڵ ستالین هه‌موو نه‌ته‌وه‌یه‌ک له ژێر باری ئیستیبداد خه‌لاسیان هات حه‌مه‌ش ده‌توانین به زمانی خۆمان وه‌زیفه‌ی میللی خۆمان پێک بێنین ،به میللییه‌ت عه‌لاقه نیشان بده‌ین.
جا ئه‌ی خوشکه‌کان کچانی خۆتان بۆ مه‌دره‌سه‌کان به‌ڕێ بکه‌ن،ئه‌گه‌ر حه‌ز ده‌که‌ن میلله‌تی کوردی وه‌کوو میلله‌تی دیکه وه‌سه‌رکه‌ون ده‌بێ کچ و کوڕ وه‌کوو خوشک و برا بۆ به‌جێ گه‌یاندنی ئه‌مری پێشه‌وای موعه‌زه‌م فیداکاری بکه‌ن.له دواییدا تکا ده‌که‌م ئێوه‌ش له گه‌ڵ من هامده‌نگ بن و بڵێن: بژی پێشه‌وای موعه‌زه‌می کوردستان.
تێبینی: ئه‌م وێنه‌یه‌ی ڕێژه‌ی شاگردانی مه‌دره‌سه‌ی کچان به سپاسه‌وه له کتێبی" ساوجبلاغ مکری (مهاباد)" وه‌رگیراوه. ئه‌ویش له ئارشیوی نه‌مر سه‌ید عوبه‌یدیلای ئه‌یووبیان (بڕره‌ک)ی وه‌رگرتووه.
هیچ نظری موجود نیست:
ارسال یک نظر