۱۳۹۲ آبان ۶, دوشنبه

ووڵامی میرزا غه‌نی خوسره‌وی شارداری مه‌هاباد بۆ میرزا که‌ریم خوسره‌وی به‌رپرسی ئیداری نه‌وت




ووڵامی میرزا غه‌نی خوسره‌وی شارداری مه‌هاباد بۆ میرزا که‌ریم خوسره‌وی

آغای کەریم خوسرەوی
جوابی ژماره‌ ١٨٦، ١٧/ ٩ / ٢٥  مەوزووعی بیست بۆشکە گازاوییل و نەوتی ڕەش مەسرەفی حەمامی شێروخورشید-
تا زەمانێک کە لە تەحتی تەسەدی بەندە دا بووە موتابیقی ئیدیعای شەخسی خۆت مەبلەغی هەزار تمەن بابەتی قیمەتی گازاوییل و نەوتی مەسرەفی ئەخیری حەمامی شێرو خورشید بە شیرکەتی تەرەقی حەواڵە و پەرداخت کراوە کە تا ئەوڕۆ بۆ تەسوییەی ئەو هەزار تمەنە و تەنزیمی سەنەدی قەتعی حازر نەبوون و ئەلئانیش ئەمن نازانم  لە ڕووی چی موتالەبەی قیمەتی ٢٠ بۆشکە گازاوییل و نەوتی ڕەش دەکەن پێویستە شەخسەن لە گەڵ سووڕەت حیسابی مەڕبووتە لە شارداری حازر بن تا نیسبەت بە حیسابی نێو براو ڕەسیدەگی و ئەڵبەتە موتابقی ڕەسیدی موڕاجەعە تەسوییەی حیساب دەکرێ – ڕەئیسی شارداری مەهاباد-  خوسرەوی

شیکردنەوەیەکی کورت
ئەو نامەیە ووڵامی میرزا غەنی خوسرەوی شارداری مەهابادە لە سەردەمی کۆماری کوردستان دا کە بۆ میرزا کەریم خوسرەوی بەرپرسی " ئیدارەی نەوتی مەهاباد" ی نووسیویە ( بڕوانە بەڵگەی پێشوو) . دەقی هەر دووک نامەکان وەک یەک وایە جگە لە وە نەبێ کە لە یەکێک لە نوسخەکان دا نووسراوە " سەرۆکی شارداری " ، و لە ئەویدییان " دا " ڕەئیسی شارداری مەهاباد" . میرزا غەنی خوسرەوی جێگای باوەڕی پێشەوا بووە و لە سەفەر بۆ ناوچەکانی باکووری کوردستان هاوڕێیەتی پێشەوا و کاربەدەستانی دیکەی کردووە. لە دوو وێنەی بەکۆمەڵ دا کە بەدەستەوەن میرزا غەنی لە یەکیان لە تەنیشت پێشەوا دانیشتووە و لەوی دیکەیان دا لە لای ڕاوەستاوە. ئەم وێنەی میرزا غەنی خوسرووی لە ڕووی یەکێک لەو وێنانە ساز دراوەتەوە. (ح.ق.)
ئەو نامانە بە سپاسەوە لە لاپەڕەی "بەڵگە مێژووییەکان" لە تۆڕی کۆمەڵیی فەیس بووک کە بەڕێز فەرەیدوون حەکیم زادە بەڕێوەی دەبا وەرگیراون و ئەویش خاونی ئه‌و نامانه‌ی وەک " ک. خ"  ناساندووە. سپاس بۆ هەر دووکیان . ئەو کارە جێی پێزانینی زۆرە بۆ مێژووی وێنەیی و بەڵگەیی کۆماری کوردستان.  

۱۳۹۲ مهر ۲۰, شنبه

به‌ڵگه‌یه‌کی کانگای نه‌فتی مه‌هاباد (ئیداره‌ی نه‌فتی مه‌هاباد) له‌ سه‌رده‌می کۆمار دا



به‌روار  17 / 9 / 25
ژماره‌ 186
ئێمبله‌م
کانگای نه‌وت
مهاباد
ئاغای میرزا غه‌نی خوسره‌وی
له‌ زه‌مانی ته‌سه‌دی جه‌نابت له‌ شێروخورشید بیست 20 بۆشکه‌ گازۆڵ و نه‌وتی ڕه‌ش مه‌وجبی ڕه‌سید به‌ ئیمزای جه‌نابت به‌ حه‌مامی شێروخورشید دراوه‌. ئێستا شێروخورشید له‌ په‌رداختی پووڵ خودداری ده‌کا و ده‌ڵێ به‌ من مه‌ڕبووت نێ. ڕه‌جا ده‌که‌م ته‌کلیف موعه‌یه‌ن  فه‌رموون
ئیداره‌ی نه‌فتی مهاباد  که‌ریم خوسره‌وی
مۆر: شرکه‌تی نفتی مهاباد
1325
17/9/25
ئاغای مه‌نگوریان نازانم ئه‌وه‌ چ پووڵێکه‌ ئاغای که‌ریمی خوسره‌وی ئیدیعائ ده‌کا مه‌گه‌ر  پووڵی نه‌فت و گازاویل نه‌دراوه‌. له‌رووی سه‌وابقه‌وه‌ پێم بڵێ. خوسره‌وی


شیکردنه‌وه‌یه‌ک له‌ سه‌ر ئه‌م به‌ڵگه‌یه‌
ئه‌م به‌ڵگه‌یه‌ بریتییه‌ له‌ داوخوازی قه‌رزێک له‌ لایه‌ن که‌ریمی خوسره‌وی به‌رپرسی کانگای نه‌فت (ئیداره‌ی نه‌فتی مهاباد) له‌ سه‌رده‌می کۆماری کوردستان که‌ بۆ میرزا غه‌نی خوسره‌وی شارداری مه‌هاباد نووسراوه‌. ڕه‌نگه‌ له‌و ده‌گمه‌ن به‌ڵگانه‌ بێ که‌ ده‌یسه‌لمێنێ له‌ سه‌رده‌می کۆمار دا دامه‌زراوه‌یه‌کی تایبه‌تی بۆ پێڕاگه‌یشتن به‌ ساتو سه‌ودا و پێوه‌چاران به‌ماده‌ی سووته‌مه‌نی هه‌بووه‌.
له‌ خواره‌وه‌ی نامه‌که‌ دا شارداری مه‌هاباد میرزا غه‌نی خوسره‌وی داوا له‌ کارمه‌ندێکی به‌ر ده‌ستی ده‌کا وه‌پێوشوێنی ئه‌و دراوه‌ ده‌پێداماوه‌ بکه‌وێ و پێشینه‌که‌ی بدۆزێته‌وه‌ و ئاگاداری کاته‌وه‌. نه‌خۆشخانه‌ی شێروخورشیدی سوور له‌ ساڵی 1309ی هه‌تاوی (محه‌مه‌دی سه‌مه‌دی) له‌ مه‌هاباد  دامه‌زراوه‌. چه‌ندین که‌س له‌ بنه‌ماڵه‌ی خوسره‌وی له‌ کاربه‌ده‌ستانی چالاکی کۆماری کوردستان بوون.
تێبینی: ئه‌و به‌ڵگه‌یه‌ به‌ سپاسه‌وه‌ له‌ تۆڕی کۆمه‌ڵیی  فه‌یس بووک له‌ لاپه‌ڕه‌ی کاک فه‌ره‌یدوون حه‌کیم زاده‌ وه‌رگیراوه‌ و ئه‌ویش خاوه‌نه‌که‌ی وه‌ک ' ک.خ ' ناساندووه‌.
سپاس بۆ به‌ڕێز عه‌بدوڵای سه‌مه‌دی بۆ ساخکردنه‌وه‌ی چه‌ند ووشه‌ی نێو  ئه‌م به‌ڵگه‌یه‌!

۱۳۹۲ شهریور ۱۸, دوشنبه

هێندێک له‌ خوێندکارانی ناوچه‌ی باکووری کوردستانی ئێران له‌ مه‌دره‌سه‌ی نیزامی باکۆ

 ده‌سته‌یه‌ک له‌و خوێندکارانه‌ی که‌ له‌ سه‌رده‌می کۆمار دا بۆ خوێندن ناردرانه‌ مه‌دره‌سه‌ی نیزامی باکۆ.له‌ ڕاسته‌وه‌ بۆ چه‌پ دانیشتووان: سه‌ید مووسا ساداتی نه‌هری، ڕاژان. ڕه‌حمان خۆشناو بۆکانی. سه‌ید سه‌عید حوسێنی ، سه‌ڵماس، شپیران.  ڕاوه‌ستاوان له‌ ڕاسته‌وه‌: سه‌ید حه‌میدی ساداتی نه‌هری، کوڕانه‌، سه‌ید محه‌مه‌د جه‌ماڵی ساداتی نه‌هری ،کوڕانه‌، سه‌ید عه‌زیزی ساداتی نه‌هری کوڕانه‌
( کوڕانه‌ گوندێکه‌ له‌ ناوچه‌ی سۆمای برادۆست)

تێبینی: ئه‌م وێنه‌یه‌ به‌ سپاسه‌وه‌ له‌ لایه‌ن به‌ڕێز ده‌رسیم ئورامار ڕا بۆ " وێنه‌ی کۆماری کوردستان " ناردراوه‌، ئه‌ویش له‌ فه‌یس بووک له‌ لاپه‌ڕه‌ی " ئورمییه‌ کلووب" ی وه‌رگرتووه‌. شه‌رحی وێنه‌که‌ش ده‌بێ ئی "ئورمییه‌" کلووب بێ که‌ به‌ فارسی نووسراوه‌ و که‌سانی نێو وێنه‌که‌ی وه‌ک " افسران جمهوری مهاباد ولی هیچوقت اسمی از آنان برده‌ نشد" من پێم وایه‌ ئه‌و وێنه‌یه‌ له‌ باکۆ گێراوه‌ و ئه‌و به‌ڕێزانه‌ش له‌ زومره‌ی ئه‌و خوێنکارانه‌ دا بوون که‌ کۆماری کوردستان له‌ مانگی 4ی ساڵی 1946 دا ناردنی بۆ باکۆ، به‌ڵام به‌ هه‌ڵوه‌شانی کۆمار زۆربه‌یان گه‌ڕانه‌وه‌ کوردستان. هه‌ر جۆره‌ زانیارییه‌کی دی له‌ سه‌ر ئه‌م وێنه‌یه‌ جێی سپاسه‌.

۱۳۹۲ خرداد ۲۶, یکشنبه

سەید محەمەدی تەهازادە معاونی ڕێبەری حیزبی دێمۆکڕاتی کوردستان و شاعیر سەید کامیلی ئیمامی لە دوای ڕووخانی کۆمار لە زیندانی ورمێ


تێبینی : ئەم وێنەیە ئی ئاڕشیڤی نەمر سەید محمەدی تەهازادە (ئەییووبیان) یەکێک لە جێگرەکانی پێشەوا لە حیزبی دێموکڕاتی کوردستان وەرگیراوە. لە پشت وێنەکە چەند بەیت شێعری نووسیوە و بەزمانی فارسی ئاوا باسی شوێن و تەئریخی گرتنی وێنەکە دەکا: " ٢٦/١١/٢١ ڕۆژی چوارشەمە هاوتای ٣٠ ع١ ١٣٦٧  سەعاتی ١ی دوای نیوەڕۆ لە حەوشەی زیندانی ڕەزائییە (ورمێ) بۆ یادگاری لە خزمەت ئاغای سەید محەمەد کامیلی ئیمامی ئەلحوسێنی گیرا".

ووتارێکی هەواڵدەریی " ئاسۆشییەتد پڕێس" لە مەڕ دامەزرانی جمهووری کوردستان، جووڵانی ئەڕتەشی سوور و قسەی ئەمیر ئەحمەدی

                             هێزەکانی شووڕەوی دەچنە ناو بۆکان

 سەربازانی سۆڤییەت دەچنە ناو بۆکان
کوردستانی سەربەخۆ دوایین ئامانجی ئاڵوگۆڕ لە ئێران
 تاران، ١٥-ی مارس  [ ١٩٤٦ ] ! – ئاسۆشییەتد پڕس
-ستوونێکی ڕووسی کە بەر و باشوور دەجووڵێ لە دەور و بەری دەریاچەی ورمێ لە نزیک سنووری تورکیا و عێڕاقەوە ، ئەمڕۆ دەگوترێ یەکە پێشەنگەکانی گەیشتوونە بۆکان کە لە باکووری ئوستانی کوردستان هەڵکەوتووە و لە ٦٠ مایلی باشووری ڕۆژهەڵاتی سابڵاغە کە پێتەختی شێخ نشینی نیوە ئۆتۆنۆمی سەرۆکی کورد قازیی محەمەد ە.
 ئەو جووڵانە بە ڕواڵەت لە دووی ئەو تیورییە دەدا کە لە ناو زۆر لە ئێرانییەکان و کاربەدەستانی حکوومەتانی بێگانە باوە کە ڕووسەکان پێیان خۆشە  کوردستانێکی سەربەخۆ بۆ کوردەکانی ئێران ، عێڕاق و تورکیا دامەزرێنن.
 ئاڵوگۆڕەکانی ئەو دواییانە  ڕۆژی پێنجشەمە ڕاگەیاندنێکی وەزیری شەڕی ئێرانی بە دوو داهات  کە سەربازانی دیکەی سۆڤییەت لە کەرەج دامەزراون  کە لە ٢٠ مایلی باکووری ڕۆژئاوای تاران هەڵکەوتووە. و ئەوە بە " هەڕەشەیەکی جیدی" دەزاندرێ بۆ سەر پێتەخت تاران  و ئەوەی کە ئەڕتەشی ئێران ئامادەیە  تا "دووایین نەفەری خۆی شەڕبکا" ئەگەر ڕووسەکان بێنە ناو تارانەوە.
 وەزیرەکە ژەنەڕاڵ سپەهبود ئەمیر ئەحمەدی ڕایگەیاند  سەربازانی شووڕەوی و چەک وچۆڵی شووڕەوی بە باری ترێن گەیشتوونەتە کەرەج و هەموو جوورە هەنگاوی پێویست هەڵگیراوەتەوە بۆ ڕووبەڕوو بوونەوە لەگەڵ ئەو " هەڕەشە " یە.
 دەستەیەک لە ڕۆژنامەنووسانی بریتانیایی دوێنێ لە کەرەج گەڕاونەتەوە و لە زمان دانیشتووانی ئەوێوە دەڵێن سەربازخانەی ڕووسی لە وێندەرێ بە چوار واگونی ترێنی پڕی سەرباز و پێداویستییەکان  لە ماوەی هەشت ڕۆژی ڕابردوو دا ڕاهێزێندراوە.
  هیچ ڕاپۆرتی دیکە نەهاتووە سەبارەت بە دوو ستوونی دیکەی ڕووسی کە چەندین ڕۆژ لەمەو بەر لە تەورێزەوە جووڵاون. دوایین ڕاپۆرت ئەوەیە کە یەک لەو ستوونانە بەرەو ڕۆژئاوای مەرەند و خوێ چووە لە سنووری تورکیا ، لە باکووری دەریاچەی ورمێ . ستوونەکەی   دیکە چووەتە ناو میانە و ئێستگەی ئاسن و تێرمیناڵی ڕێگاوبان لە باکووری زەنگان.
 لەوەتی هێزە هاوپەیمانەکان لە ساڵی ١٩٤١ چوونە ناو ئێران ، قازیی محەمەد حکوومەتی نیوەئۆتۆنۆمی خۆی لە ناوچە عەشیرەتییەکانی دەورو بەری ساوجبولاغ دامەزراندووە.
 لە مانگی نۆڤامبری ١٩٤٥، کاتێک پارتیزانە دێمۆکڕاتەکان لە ئوستانی ئازەربایجان دەستیان کرد بە سەرهەڵدانی خۆیان کە زۆربەی ئوستانەکەی لە پاشماوەی ئێران دابڕی ، ڕۆژنامە ئێرانییەکان  ڕاپۆرتیان دا  قازیی محەمەد " سەربەخۆیی هەموو کوردستان " ی ڕاگەیاندووە.
 ئەمیرئەحمەدی ڕاگەیاندنەکەی خۆی دوای دیدارێکی کورت لەگەڵ شا دەربڕی ، کە فەرمانەی هەرە بەرزی ئەڕتەشە.
 ئەو گوتی:  " ئێران بە جیهانی نیشان داوە "  " نەتەوەیەکی ئاشتیخوازە ، بەڵام ئەگەر ڕووسیا کردەوەیەکی ئاشکرا بکا نەک هەر هەموو سەربازان بەڵکوو هەموو کوڕ و کچێک لە سەر شەقامان شەڕ دەکەن و پێتەختەکەیان دەپارێزن" .



تێبینی: ئەم بڕاوەی ڕۆژنامەیە لە "فەیس بووک" وەرگیراوە


۱۳۹۲ اردیبهشت ۸, یکشنبه

وێنه‌یه‌کی دیکه‌ی سه‌یفی قازی لە شاری کیسلۆڤۆدسک لە باکووری قەفقاس

وێنه‌یه‌کی دیکه‌ی ژه‌نه‌ڕاڵ مایۆر محه‌مه‌د حوسێنی سه‌یفی قازی وه‌زیری به‌رگری کۆماری کوردستان له‌ کیسلۆڤۆدسک. ئه‌م وێنه‌یه‌ له‌  7 مانگی 9ی ساڵی 1946ی زایینی هه‌ڵگیراwe . به‌ داخه‌وه‌ که‌سه‌که‌ی دیکه‌مان جارێ بۆ نه‌ناسراوه‌ته‌وه‌.

تێبینی: ئه‌م وێنه‌یه‌ له‌ ئاڵبۆمی بنه‌ماڵه‌یی دا بووه‌. تکایه‌ ئه‌گه‌ر وێنه‌یه‌ک یان شه‌رحی وێنه‌یه‌ک لێره‌وه‌ ده‌گوێزنه‌وه‌ هه‌میشه‌ ئاماژه‌ به‌ سه‌رچاوه‌ بکه‌ن. له‌و ماوه‌یه‌ دا کتێبێک به‌ ناوی " مێژووی کۆماری کوردستان له‌ وێنه‌ دا " بڵاو بووه‌ته‌وه‌، سه‌ره‌ڕای ئه‌وه‌ی زۆر شتی له‌ " وێنه‌ی کۆماری کوردستان" وه‌رگرتووه‌، به‌ڵام به‌ ڕو هه‌ڵماڵاوییه‌وه‌ که‌مترین ئاماژه‌یه‌کی به‌و سه‌رچاوه‌یه‌ نه‌کردووه‌. جگه‌ له‌ هه‌ڵه‌ی زه‌ق که‌ ئه‌وه‌ش سووکایه‌تییه‌ به‌ بیره‌وه‌ری کۆمار.

۱۳۹۱ اسفند ۲۰, یکشنبه

خیتابه‌ی شاسوڵتانی فه‌تتاحی قازی له‌ کۆنفڕانسی سوخه‌نڕانی یایان

یای شا سوڵتانی فه‌تتاحی قازی له‌ گه‌ڵ هاوسه‌ری خه‌لیلی فه‌تتاحی قازی که‌ له‌ سه‌رده‌می کۆمار دا سه‌رۆکی ئیداره‌ی دوخانییه‌ی مه‌هاباد بوو.


ڕۆژنامه‌ی کوردستان، دووشه‌مۆ 2-ی بانه‌مه‌ڕی 1325ی هه‌تاوی/ 22ی ئاوریلی 1946
ز- خیتابه‌ی شاسوڵتانی فه‌تتاحی قازی
خوشکه‌کانی خۆشه‌ویست. ساڵها کورد له‌ژێر ده‌ستی دوژمنان دا زه‌لیل و هه‌میشه‌ چاو له‌ ده‌ست و هه‌ناسه‌ سارد بوون، حه‌تتا به‌ ئه‌ندازه‌یه‌کیان زوڵم و سه‌ختگیری لێ ده‌کردین که‌ نه‌مان ده‌توانی به‌ ئاشکرایی بڵێین کوردین، ئه‌مما خودا روحمێکی وای به‌ مه‌ کرد که‌ ده‌وڵه‌تی ئێران بۆمب باردمان کرا و دوژمنان له‌ سه‌ر مڵک و ماڵی ئێمه‌ لاچوون  و ته‌می به‌دبه‌ختی  له‌ سه‌ر شانی کوردان ڕه‌وی  و غه‌م و نه‌گبه‌تییان له‌ سه‌ر خه‌ڵاس بوو.
خوشکانی خۆشه‌ویست له‌ ساڵی بۆمب باردمانێوه‌ هه‌تا ئه‌وڕۆ پێنج ساڵه‌. ئه‌ڵبه‌ته‌ هه‌مووتان ئیتیلاعوو هه‌یه‌  که‌ پێشه‌وای موعه‌زه‌می کوردستان  ده‌ عه‌رزی ئه‌و پێنج ساڵه‌ی دا به‌ شه‌و و به‌ ڕۆژ خۆراک لێ هه‌ڵگیراو بوو  بۆ ئێمه‌، خه‌ریکی ئه‌وه‌ی بوون که‌ برایان و خوشکانی خۆی له‌ ژێر ده‌ستی زاڵمان بێنێته‌ ده‌رێ . له‌ سایه‌ی هیممه‌تی خودایه‌وه‌ و زه‌حمه‌تی پێشه‌وای موعه‌زه‌می کوردان له‌و زه‌لاله‌ته‌ ڕزگارییان هات  و ڕۆژی ڕه‌شیان وه‌ رووناکی که‌وت. ئه‌لعانه‌که‌ هه‌رچه‌ند به‌ده‌ور و پشتی خۆمانه‌وه‌ ده‌ڕوانین هیچ ڕۆژێکیان له‌و ڕۆژه‌ی خۆشتر چاو پێ نه‌که‌وتووه‌ که‌ ده‌بینین ئاڵای موقه‌ده‌سی کوردان له‌ ئاسمانێ ده‌لارێته‌وه‌ و کوردستانی گه‌وره‌ به‌ ئازادی و سه‌ربه‌خۆیی زینده‌گانی ده‌کا و هیچ مه‌نزه‌رێکوو خۆشتر و جوانتر چاو پێ که‌وتووه‌  که‌ هه‌موو ڕۆژێ پێشمه‌رگه‌ی ڕه‌شیدی کورد هه‌زار هه‌زار له‌و سه‌ر تا ئه‌و سه‌ری خیابانێ سه‌ف ده‌کێشن. خوشکه‌کانی خۆشه‌ویست ده‌زانن ئه‌و هه‌موو خۆشی وبه‌شاره‌ته‌ له‌ ژێر سایه‌ی چییه‌وه‌یه‌، ئه‌وه‌ له‌ ژێر سایه‌ی سێبه‌ری پێشه‌وای موعه‌زه‌م دا به‌و ڕۆژه‌ گه‌یشتوون. ئه‌لعانیش که‌ خودا ئه‌و ڕوحمه‌ی به‌ ئێنگۆ کردووه‌  ته‌مه‌ناو لێ ده‌که‌م نابێ هیچ وه‌خت له‌ ئه‌ولادانی خۆتان غافڵ بن، ئه‌ڵبه‌ته‌ هه‌موو ده‌زانن که‌ ڕاگرتنی وه‌ته‌ن به‌ خوێندن و ته‌علیم و ته‌ربییه‌ت  ده‌بێ و ئه‌ولادانی خۆتان ناز په‌روه‌ر فێر مه‌که‌ن ، چون دونیا جێگای لێ قه‌وماو نییه‌ و دونیا جێگه‌ی ته‌نبه‌ڵی و بێکاران نییه‌ هه‌تا وه‌ختێکی خودای نه‌خواسته‌ لێیان قه‌وما  بتوانن ده‌ست بکه‌نه‌وه‌، له‌ به‌ر وه‌ته‌نی خۆیان روحی خۆیان فیدا بکه‌ن و دوژمن به‌ سه‌ر ئه‌وان دا غاڵب نه‌بێ و ته‌ماع ده‌ ماڵ و نامووسی وان نه‌توانێ بکا.
هه‌ڵکراو بێ هه‌تا ئه‌به‌د  په‌رچه‌می موقه‌ده‌سی کوردستان
به‌رقه‌رار و پایه‌دار بێ پێشه‌وای موعه‌زه‌م

تێبینی: ئه‌م وێنه‌یه‌ی یای شاسوڵتانی فه‌تتاحی قازی و هاوسه‌ری میرزا خه‌لیلی فه‌تتاحی قازی ئی دوای ڕووخانی کۆماری کوردستانه‌ له‌ مه‌هاباد.

وێنه‌ی یه‌کی دیکه‌ی یای مینای قازی و دوو له‌ کچه‌کانی

له‌ لای ڕاسته‌وه‌ عیسمه‌تی قازی، یای مینای قازی و عیفه‌تی قازی


ڕۆژنامه‌ی کوردستان، ژماره‌ی 37، شه‌مۆ 31ی خاکه‌لێوه‌ی 1325ی هه‌تاوی/ 20 ئاوریلی 1946
کۆنفڕانسی سوخه‌نڕانی یایان
ڕۆژی جومعه‌ 17ی مانگی ڕه‌شه‌مه‌ی 1324 [ی هه‌تاوی] مه‌جلیسی سوخه‌نڕانی یایان و کیژانی مه‌هاباد له‌ خانه‌ی فه‌رهه‌نگی کوردستان گیرا. له‌ پێشدا له‌ لایه‌ن یای پێشه‌وا مه‌جلیس ئیفتیتاح کرا و به‌یاناتێکی چاکی ڕاجیع به‌ عیلمو فه‌رهه‌نگ و ته‌ڕه‌قییاتی ده‌وڵه‌تی ئیتیحادی جه‌ماهیری شووڕه‌وی ئیراد فه‌رموو و چه‌ند نه‌فه‌ر له‌ کیژان و یایانی موحته‌ڕه‌م خیتابه‌یان خوێنده‌وه‌ که‌ له‌ ژێره‌وه‌ ده‌هێندرێته‌ به‌رچاو:
ئه‌لف: خولاسه‌ی به‌یاناتی یای پێشه‌وای کوردستان:
یایان و کیژانی خۆشه‌ویست، بزانن که‌ ژنان له‌ ده‌وڵه‌تی ئیتیحادی جه‌ماهیری شووڕه‌وی دا پێشڕه‌فتێکی  سه‌ر لێ سوڕماویان کردووه‌ و له‌ زانست و فه‌رهه‌نگ دا کامیله‌ن شان به‌ شانی پیاوان ده‌چنه‌ پێش. ئه‌م ڕۆژانه‌ ده‌بینم که‌ باوکان و دایکان له‌ بابه‌ت ناردنی کوڕ و کچیان بۆ مه‌داریس شه‌وقێکی قابیلیته‌قدیر ده‌نوێنن. هومێدم وایه‌ له‌و کۆششه‌ دا قه‌ده‌مێکی توندتر هه‌ڵێنین که‌ به‌ڵکوو به‌ یارمه‌تی خودای به‌رز وته‌وه‌جوهاتی ده‌وڵه‌تی کوردستان له‌ ماوێکی که‌م دا پیاو و ژنی بێ سه‌واد له‌ کوردستان دا نه‌مێنێ...
----------
ب – خیتابه‌ی کیژ، عیفه‌تی قازی
خانمه‌کان گه‌وره‌ مه‌سه‌لێکی مه‌شهوور  شێر چ نێر چ مێ. کورد خۆ به‌ شه‌هاده‌تی هه‌موو دونیایه‌ له‌ هه‌موو که‌س ئازاتره‌، ئه‌دی چۆن ده‌بێ به‌ خسووس ده‌ دنیای ئه‌وڕۆ دا که‌ له‌ هه‌موو ده‌وڵه‌تێکی پیاو و ژن پێکه‌وه‌ کاری ووڵاتی خۆیان ئیداره‌ ده‌که‌ن و بۆ ئیداره‌ی ووڵاتیش خوێندن و سه‌واد لازمه‌ و به‌ڵکوو  کابانی و خانه‌داری و منداڵ به‌خێوکردنیش. هه‌رچی عیلم و سه‌واد زیاتر بێ و له‌ گه‌ڵ قومقومه‌ی سیری و لایی لایی لانکێ خۆشه‌ویستی و نیشتمان په‌رستنی میللی به‌ منداڵ فێر بکرێ قه‌ت له‌ بیری ناکا. میله‌تێکی ئه‌و نه‌وعه‌ دایکانه‌ی هه‌بێ ڕۆژ به‌ ڕۆژ ده‌ سه‌رکه‌وتن دایه‌. ده‌ جا وه‌ن به‌ خۆتان و منداڵتانه‌وه‌ بخوێنن و شارێکی وه‌ک شاری مه‌سکه‌و که‌ ئه‌و عکسانه‌ی له‌ پێش چاوانه‌ ساز که‌ین و ووڵاتی خۆمان به‌ عیلم و سه‌نعه‌تی وا بڕازێنینه‌وه‌.

تێبینی : ئه‌م وێنه‌یه‌ له‌ مه‌هاباد، 6 یا 7 ساڵ له‌ دوای ڕووخانی کۆماری کوردستان له‌ماڵی پێشه‌وا هه‌ڵگیراوه‌